Ploner Melanie y David Frena pro i mius a livel talian
Schitour - Le Tour de Sas 2015 à ospité en domënia ai 18 de jenà le Campionat talian de schitour di jogn. I organisadus à salpü da ti pité na gara spetacolara cun trëi percursc interessanć sides ai atleć dles trëi categories sides ai spetadus, che à podü odëi y vire para da daimprò gran pert dla gara. Grana é stada la sodesfaziun di organisadus da odëi en domënia da doman i 140 atleć jogn dl schitour talian al start sö La Crusc. Grana é inće stada la sodesfaziun di partezipanć y di spetadus, che à podü aprijé al mascimo le percurs de gara nü cun n tëmp y n panorama unics. A livel nazional àn podü tó pert ala gara tres la staziun radio NBC.
I trëi percursc de gara, arjignà ca tecnicamënter cun gran cura sön mosöra por les trëi categories di „cadetti“, „junior“ y „espoir“, à metü ala proa i atleć sides por ći che reverda süa condiziun fisica sides por sciöche ai ê bugn da interpretè la gara. Ëi messâ afrontè tòć a pé y tòć cui schi söpert y jöpert. I atleć jogn taliagn à mostrè sö n buniscimo livel, che ai à inće bele desmostré a livel mondial. Danter i plü stersc êl inće i dui partezipanć dl post: David Frena y Melanie Ploner. Ala gara à inće 6 d’atri atleć dl post tut pert: Mike Trebo, Ploner Nicolas, Irsara Luigi, Canins Ivan, Rottonara Luca y Clara Valentina.
Pro les 18 „cadette“, che â n percurs de 4,4 km cun 605 m de deslivel é Ploner Melanie rovada secunda te 42:31, do da Murada Giulia che à stlüt jö la gara tl tëmp de 42:13. Clara Valentina à arjunt le 15ejimo post te 54:58.
Pro i 38 „cadetti“, é Gusmeroli Davide stè le plü asvelt te 34:23. Ploner Nicolas à arjunt le 32ejimo post te 46:08, Irsara Luigi le 34ejimo post te 50:08, Canins Ivan le 35ejimo post te 52:59 37 y Rottonara Luca le 37ejimo post te1:47:57.
Pro i 40 partezipanć dla categoria „junior“, che â n percurs de 6,9 km cun 820 m de deslivel, à David Frena arjunt le 6. post te 53:49 y Trebo Mike le 31ejimo post tl tëmp de 1:02:26. Pröm é stè Magnini Davide te 48:10. Le titul de campionëssa taliana pro les „junior“ él stè Alba De Silvestro che à davagné.
Pro i „espoir“ che â n percurs de 12 km cun 1450 m de deslivel él stè Martina De Silvestro che à davagné te 1:43:00 y Nadir Maguet te 1:20:36.
Le presidënt dl comitê Daniele Irsara é dër contënt por le suzès dla 7. ediziun dl Tour de Sas y sambëgn dla buna colaboraziun cun i tröc volontars y cun i sponsor, dilan a chi che la manifestaziun à podü gnì a s’al dè y garatè. Por deplü informaziuns sura i resultać, le percurs y por les fotografies: www.tourdesas.it. (Badiasport)