Michael Moling de Badiasport pro i pröms 9
Schitour - En domënia ai 11 de jenà él stè a Weissenbach le „Skialprace Ahrntal“, gara de schitour che chërda adalerch atleć da dalunc adalerch. La gara valô sciöche gara dl ISMF International Race, sciöche gara de Coppa Italia y sciöche gara dl Südtirol Cup.
Les condiziuns dl tëmp ê critiches, danter le vënt sterch y la nëi plü alalt, mo impò é la gara gnüda fata, mudan le percurs ćiamò tratan la gara. Le percurs de 14 km cun 1650 m de deslivel, preodô toć da jì a pé, toc cui schi söpert y jöpert cun indöt 11 „cambi“. Dales 10 êra spo tan inant y i 177 partezipanć é pià ia dal start cun i schi tla man. Danter ëi êl inće 5 atleć de Badiasport che à arjunt de buniscimi resultać.
I trëi plü asvelt de düć, düć trëi dla categoria seniores ëi sciöche inće i atleć de Badiasport, é stà Trento Denis, cun n tëmp de 1:19.45, Pivk Tadei cun n tëmp de 1:21.01 y Neurauter Armin cun n tëmp de 1:21.56. Tosc dô rovâ adalerch le pröm de Badiasport, Michael Moling, arjunjon le 9. post tla categoria totala di seniores di ëi, tl tëmp de 1:25.37. Le secundo miù badiot é stè Lois Craffonara, tl tëmp de 1:27.52, rovan al 15ejimo post. Jan Paul Adang é rové al 25ejimo post te 1:33.08, René Irsara al 43ejimo post te 1:41.08 y Michael Irsara al 48ejimo post te 1:42.25, sön indöt 67 atleć de chësta categoria rovà al travert.
Cun chisc resultać s’à i atleć de Badiasport posizionè dancà tla tlassifica por le Südtirol Cup:
Michael Moling al 2. post, Lois Craffonara al 4. post, Jan Paul Adang al 7. post, René Irsara al 18ejimo y Michael Irsara al 20ejimo post. Pröm te chësta tlassifica é stè Roberto De Simone te 1:22.34 y terzo Innerhofer Paul te 1.27.40.
Tla categoria dles seniores ëres, cun n percurs de 12 km y 1400 m de deslivel, é Martinelli Francesa rovada pröma te 1:00.44, Besseghini Laura secunda te 1:02.02 y Ghirardi Corinna terza te 1:03.37. (Badiasport)
Jan Paul Adang