Terzo post por Elisa
Deplü atlec de Badiasport á tut pert a »La Rampegada«, gara de Copa Talia Jonila de schialpinism. Elisa Aricó da La Ila é rovada terza tla categoria U14.
En domënia ai 7 de merz é sté a Collio, tla provinzia de Brescia, »La Rampegada«, gara de Copa Talia Jonila de schialpinism. La gara á scomencé da doman adora, sön na pista dlaciada che s'á spo tosc scialdé cun le sorëdl cialdin de merz. Bëgn 176 ê i partezipanc al start, partis sö danter categories desvalies che vá dai U12 cina ai U23. Ince deplü atlec de Badiasport é rová a Collio por tó pert ala competiziun, portan a ciasa de bugn resultac: tla categoria U14 feminil é Elisa Aricó rovada al terzo post, Hanna Irsara é rovada cuinta tla categoria U16 y Annalisa Pitscheider s'á plazé al 8. post. Tla seziun maschila é Maximilian Nagler rové 17., Tobias Tasser 18. y Manuel Nagler 20. Tla categoria U18 á Mara Sottara concuisté le 7. post y tla categoria U20 é Giordan Nagler rové al 13ejim post.
@Usc di Ladinz (kp)