L'ultim findledema é sté rich de gares por i atlec de Badiasport, che á da en chësc ann ince n grup de jogn che mët man da se dé jö cun le schialpinism.

En vëndres, ai 14 de forá, él sté a San Ciascian, sön la pista de Piz Sorega, le diejim trofé Oskar Costa, gara de schialpinism che fej pert dla Raida Ladina. Insciö s'á ince stlüt jö la terza gara dla competiziun che se desfira tles cater valades ladines incër le grup dl Sela y che se stlujará jö cun l'ultima gara a Sëlva, te Gherdëna, ai 11 de merz. De bugn resultac é gnüs arjunc dai atlec de Badiasport, cun le terzo post assolut tla classifica dla Raida Ladina de Mike Trebo. Trebo é rové secundo tla gara da San Ciascian cun n tëmp de 28.18, se plazan iadô l'atlet Mauro Rasom dl grup sportif Bela Ladinia. Dër de bugn resultac á ince arjunt les ëres de Badiasport, cun le terzo post de Haidi Dapunt y le cuarto y cuinto plazamënt de Anna Frilli y Susi Lezuo. Por ci che reverda la categoria di jogn s'á Giordan Nagler y Tobias Tasser plazé al secundo y al terzo post y á insciö davagné punc importanc, aspetan da desfiré la cuarta y ultima gara dla Raida Ladina ia en Gherdëna.

Transcavallo
N grup de atlec de Badiasport á tut pert l'ultim fin dl'edema ala gara „Transcavallo“ a Alpago. Nicolas Ploner y Giordan Nagler á partezipé ala „Coppa Italia Giovani“, se plazan al 20ejim y 21ejim post tla categoria Junior Under23. Ala gara de trëi dis á ince tut pert Lois Craffonara, che á garejé adöm cun l'atlet fascian Simone Manfroi dl grup sportif Bogn da Nia. I dui atlec ladins á arjunt n bun otavo plazamënt.

„Junior Power Team“
„Junior Power Team“ á inom le nü grup che é gnü metü sö da Badiasport por i jogn y les jones danter 13 y 15 agn che mët man da fá schialpinism. Al momënt é le grup metü adöm da 6 mitans y 5 mituns che se alenëia dui iadi al'edema, n iade te palestra y n iade sön i schi. De jená á le grup tut pert a Gossensass a n „camp“ organisé dala FISI por atlec jogn scomëncia da se dé jö cun chësc sport.