La competiziun internazionala de schialpinism Pierra Menta vëgn metüda a jí dal 1986 incá, vigni ann de merz. Atlec de schialpinism da döta Europa y da foradecá s’incunta por un di majeri apuntamënc dla sajun a Arêches - Beaufort tla Savoia, tla Francia. La gara alda cun la Patrouille des Glaciers y le Trofeo Mezzalama pro les gares plü importantes y conesciüdes de schialpinism tles Alpes.

Incër 400 atlec, partis sö te 16 scuadres feminiles y 177 scuadres maschiles da dui, á afronté danter i 9 y 12 de merz, te 4 dis de gara, indöt 10.000 m de deslivel. Le percurs coliëia 15 pizes da 2.000 a 2.687 metri tres tapes söpert sfadioses y toc jöpert spetacolars. La gara é gnüda acompagnada sciöche vigni ann da milesc de spetaturs, che cun ciampaneles y trombëtes sostëgn i mius atlec europeics de chësc sport ti cater dis de competiziun.

Lois Craffonara y Michael Moling de Badiasport á tut pert ales cater tapes arjunjon n resultat ezelënt, se posizionan al 14. post.

Ai á stlüt jö i cater dis de gara cun n tëmp total de 12:00:59: le pröm de cun 02:35:04, le secundo de cun 03:05:50, le terzo de cun 03:08:01 y le cuarto de cun 03:12:04.

Pröms é stá Eydallin / Lenzi cun n tëmp total de 10:23:55 (T1 02:17:05; T2 02:43:47; T3 02:36:40; T4 02:46:23). Secundi é stá Jornet Burgada / Sévennec cun n tëmp total de 10:37:14 (T1 02:21:55; T2 02:44:54; T3 02:41:58; T4 02:48:27). Terzi é rová Maguet / Boscacci te 10:40:06 (T1 02:20:35; T2 02:46:32; T3 02:41:36; T4 02:46:23).