Le vëndres sëra ai 13 de jená él sté a Saalbach la 19ejima „Mountain attack“. Ala gara tl Pinzgau él rové adalerch indöt 1.100 atlec dal’Austria, Germania, Slovenia, Svizera y sambëgn ince dal’Italia, daterater cun i dui atlec de Badiasport. I partezipanc s’á mosoré sön 3 percursc desvalis. Lois y Michael á fat para pro le percurs „Marathon“ cun 3.000 m de deslivel che i condejô sura bëgn 6 pizes. I atri dui percursc ê le „Schattberg race“ cun 1.017 m de deslivel y le „Tour“ cun 2.036 m de deslivel sura 4 pizes.

Le percurs che i dui badioc á chirí fora, cun lapró condiziuns climatiches da nëi frësca y 6 gra de frëit s’á damané na buna preparaziun atletica. „Jij“ y Michael é piá ia cun indöt 209 concorënc te süa categoria y á arjunt le travert danter i pröms 19. Michael é rové sciöche 14ejimo al travert te 2:46:00; Lois sciöche 19ejimo te 2:50:13.

I pröms trëi é stá Palzer Anton dala Germania te 2:21:34, Hoffmann Christian dal’Austria te 2:26:59 y Pivk Tadei dal’Italia te 2:27:07.