Schi d'alpinism – Dai 11 ai 13 de dezëmber él gnü metü a jí i campionac taliagn a Madonna di Campiglio. Cater de nüsc atlec á tut pert tles categories jogn y senior.

Trëi gares te trëi dis o dí en gran sforz por en atlet. Sce al é spo ciamó gares importantes sciöche i capionac taliagn, ciarun da se proé ciamó deplü. Dan da otedé êl por David Frena, Ivan Canins, Nicolas Ploner y Michael Moling de Badiasport sön program i capionac taliagn de sprint, stafeta y vertical de schi d'alpinism a Madonna di Campiglio.
Le fin dal edema de gares á metü man le vëndres sëra con le sprint, olache Ivan, Nicolas y David é jüs al start. Dô les cualificaziuns podea i mius sis ciamó en iade garejé y proé insciö da rosedé le resultat dles cualitficaziuns. Por i atlec de Badiasport s'é la gara roada do la cualificaziun. Pla categoria jogn é Nicolas roé al 24. post, Ivan al 30. y pla categoria junior é David roé 13.
La sabeda él gnü fat la stafeta con scuadres da trëi atlec. Nicolas Ploner y David Frena á arjunt adöm a Johanna Unterer dl ASV Martell le 14. post con en tëmp de 33:12.10.
Por slü jö i capionac taliagn él ste la domënia la gara vertical, gara plü aspetada dal fin dal edema. Düc i atlec co á tut pert á podü se ralegré con en bun resultat. Pla categoria senior á Michael Moling arjunt sön la distanza de 3,5 km y 600 metri de desfarënzia d'altëza en bun 22. post con en tëmp de 27:07.59. Pro la categoria junior é David Frena roé al 20. post con en tëmp de 22:45.23 sön na distanza de 3 km y 450 metri de deslivel. Pla categoria jogn á dui atlec arjunt de bugn plazamënc. Nicolas Ploner al 24. post (21:18.32) y Ivan Canis al 36. post (24:08.60) sön na pista 2 km lungia y con 320 metri de deslivel.

Nicolas Ploner, Ivan Canins, David Frena